小學生意的回憶

記得係我小學時期，我同同學的感情好好，一大班同學，日日一齊玩，小息又玩，放學又玩，這是人生最無憂的時間。那個時候，放學後還要參加合唱團，學唱歌表演。所以放學後會留在學校食飯，一小時後便會開始練習。



那時大部分的同學的父母好少會帶飯餸去學校俾小朋友食，大家一般都會同其他同學一齊去附近餐廳食午餐的，因為學校無飯堂的。大家就要背着那個同自己一樣重量的書包通街行，非常辛苦。我好好彩，因為屋企距離學校唔遠，而且我媽媽是家庭煮婦，所以佢可以帶飯送來給我，我只要在學校等佢便可以，每星期好似大約要練三次。學校附近有一個公園，我通常會係個公園裏面食，因為食完飯可以係公園玩，其實都好開心。個時我有幾個同學好似平時咁放學出去食飯，我見佢地背住個書包咁重，我就同佢地講，我幫你地睇住啲書包，你地去食飯啦，就係咁樣佢地幾個就放晒啲書包係度，我就一邊食我媽媽的飯，一邊看管書包，起初有兩三個書包。

細個每次小息時，我好鍾意極速跑落去小食部買零食食的，小食部的零食好平，佢將啲零食分開晒嚟賣的，可以一塊塊買、一粒粒買的，所以我可以買到好多唔同嘅款，每樣一件，10元8塊已可以買幾樣野，不過始終小學時期，零用錢有限，所以都只係可以買小小來吃。個時學校附近的公園裏面每逢放學就有一個人係度賣"金絲貓"，我地一班男仔同學都會每人買一隻來比拼一下，就好似數碼暴龍咁，就係咁我地每人就進貢俾個貓佬了。

因為我好鍾意食零食，又無咩零用錢買來食，所以就係個個時候想想辦法怎樣有錢來買零食，而我見到個貓佬收同學錢賣"金絲貓"，我就知道了原來這樣可以賺到錢的，其實咁細個從來父母都唔會教我賺錢的事，學校更加唔會教呢啲，所以只能在生活上學到，不過估唔到係由呢個貓佬開始，係個陣時一件奇怪嘅事就發生咗了。

我人生的第一個生意就係呢度開始了！我開始了幫同學看管書包收費的服務，其實起初只有兩三個書包，每個5毫子，我自己都唔知點解會收起錢來，只知道這樣可以收錢用來買零食食，之後隨着時間，越來越多同班同學甚至係其他班的合唱團同學都會將書包放在我這處，記得最多時係有超過40個書包，都幾誇張。計一計，5毫子X40個，每次可以賺20元，每星期3次，即係每星期可以賺60元，無成本，淨賺！對於一個小學生黎講，真係唔錯了，之後我就好開心了，小息時又極速跑落去小食部買零食食，我重可以買多幾件請埋我啲好friend個幾個同學一齊食。

不過因有同學同老師講我收同學錢，最後老師唔俾我繼續做落去而被迫停止了，差啲要記缺點。

「給16歲的您」